UNEC-də qeyri-rəsmi məşğulluğun qarşısının alınması mövzusunda maarifləndirici sessiya keçirildi

UNEC-in Karyera Mərkəzi Maliyyə və mühasibat fakültəsinin tələbələri üçün “Qeyri-rəsmi məşğulluğun aradan qaldırılması” mövzusunda vacib bir infosessiya təşkil edib. Məqsəd gənc mütəxəssisləri əmək bazarının qanuni qaydaları və rəsmi məşğulluğun əhəmiyyəti barədə daha ətraflı məlumatlandırmaqdan ibarətdir.

Sessiyada Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin Təhlil və strateji planlaşdırma departamentinin Təhlil şöbəsinin müdiri Mirsahib Eminov iştirak edərək tələbələrə müraciət edib. M. Eminov çıxışı zamanı qeyri-rəsmi məşğulluğun mahiyyətinə, bu problemin yaranma səbəblərinə və onun cəmiyyətə, eləcə də dövlət büdcəsinə mənfi təsirlərinə diqqət çəkib. Rəsmi əmək münasibətlərinin qurulmamasının sosial-iqtisadi inkişafa zərbə vurduğunu qeyd edən ekspert, bu sahədə həyata keçirilən dövlət tədbirləri barədə də ətraflı məlumat verib.

Mirsahib Eminov xüsusilə qeyd edib ki, qeyri-rəsmi məşğulluğun doğurduğu fəsadlar barədə ictimai məlumatlılığın artırılması həlledici əhəmiyyət kəsb edir. O, əmək münasibətlərinin tam rəsmiləşdirilməsinin və bu sahədə cəmiyyətin birgə mübarizə aparmasının vacib olduğunu vurğulayıb. Ekspertin sözlərinə görə, rəsmi işlərin təşviqi yalnız dövlət qurumlarının deyil, həm də vətəndaşların, o cümlədən gənc nəslin fəaliyyətini tələb edir.

Sessiyanın sonunda tələbələr maraqlandığı sualları verərək ətraflı cavablar alıblar. Bu ünsiyyət gənclərə əmək hüquqlarını bilməkdə və gələcək karyera qərarlarını qanunvericiliyə uyğun şəkildə qəbul etməkdə dəstək olub. UNEC-in Karyera Mərkəzi bu cür maarifləndirici tədbirlərin davam etdirilməsini planlaşdırır ki, tələbələr məzun olduqdan sonra əmək bazarında rəqabətqabiliyyətli və qanunlara sadiq peşəkarlar kimi fəaliyyət göstərsinlər.