ADAU və “Zirvə Agro” arasında əməkdaşlıq memorandumu imzalandı
Azərbaycan Dövlət Aqrar Universiteti (ADAU) ilə aqrar sahədə fəaliyyət göstərən “Zirvə Agro” şirkəti arasında strateji əməkdaşlığı möhkəmləndirmək məqsədi ilə görüş keçirilib. Həmin görüşün sonunda tərəflər birgə fəaliyyət haqqında əməkdaşlıq memorandumu imzalayıblar. Bu imzaatma, universitetin müasir kənd təsərrüfatı mütəxəssislərinin hazırlanmasında özəl sektoru daha da cəlb etməsi və tələbələrin praktiki biliklərinin artırılması baxımından əhəmiyyətli addım sayılır.
Görüşdə ADAU-nun rektoru Zəfər Qurbanov universitetin aqrar sektorun inkişafına töhfə verən, müasir bilik və bacarıqlara malik kadrların yetişdirilməsinə xüsusi önəm verdiyini qeyd edib. Rektor vurğulayıb ki, işəgötürən şirkətlərlə əlaqələrin gücləndirilməsi və tədris prosesinin real istehsalat təcrübəsi ilə əlaqələndirilməsi mühüm əhəmiyyət daşıyır. Onun sözlərinə görə, aqrar sahədə tətbiq olunan yeniliklərin tələbələrə çatdırılması onların gələcək peşəkar inkişafına böyük töhfə verə bilər. “Zirvə Agro” kimi ixtisaslaşmış şirkətlərlə əməkdaşlıq həm tələbələrin praktiki hazırlığı, həm də universitetin elmi potensialının aqrar sektorun ehtiyaclarına yönəldilməsi baxımından kritik əhəmiyyət kəsb edir.
“Zirvə Agro” şirkətinin rəhbəri və təsisçisi Mansur Məhsulov isə şirkətin fəaliyyəti, kənd təsərrüfatı istehsalçılarına təqdim olunan məhsullar və aqrar sahədə müasir yanaşmaların tətbiqi barədə məlumat verib. O, universitetlə əməkdaşlığın gələcək mütəxəssislərin əmək bazarının tələblərinə uyğun biliklərə yiyələnməsi üçün vacib olduğunu bildirib. M. Məhsulov qeyd edib ki, aqrar sektorun davamlı inkişafı üçün nəzəri biliklə yanaşı, praktiki təcrübə və müasir texnologiyaları tətbiq etmək bacarığı da zəruridir.
Görüşdə tələbələr üçün təcrübə imkanlarının yaradılması, mütəxəssislərin iştirakı ilə təlim və seminarların keçirilməsi, eləcə də aqrar sahədəki yeniliklərin tədris prosesinə inteqrasiyası müzakirə olunub. Görüşün sonunda qonaqlar ADAU-nun müasir laboratoriyaları ilə tanış olublar. Qeyd edək ki, 2021-ci ildən fəaliyyət göstərən “Zirvə Agro” şirkəti fermerləri toxum, gübrə və bitki mühafizə vasitələri ilə təmin edərək aqrar istehsalçıların ehtiyaclarını qarşılayır.