ADAU BMT-nin Dayanıqlı İnkişaf Həlləri Şəbəkəsinin (SDSN) Strategiya Şurasına daxil olub
Azərbaycan Dövlət Aqrar Universiteti (ADAU) beynəlxalq elmi əməkdaşlıq sahəsində yeni və mühüm bir mərhələyə qədəm qoyub. Universitet BMT-nin Dayanıqlı İnkişaf Həlləri Şəbəkəsinin (SDSN) rəsmi üzvlüyünə qəbul edilib və bu təşkilatın Şəbəkələr üzrə Strategiya Şurasının tərkibinə seçilib. Bu nailiyyət ADAU-nun qlobal akademik icmadakı nüfuzunu artırması və beynəlxalq şəbəkələşmə strategiyasının uğurlu tətbiqi kimi qiymətləndirilir.
2012-ci ildə BMT-nin sabiq Baş katibi Pan Gi Munun təşəbbüsü ilə yaradılan SDSN, hazırda dünya şöhrətli iqtisadçı professor Ceffri Saksın rəhbərliyi altında fəaliyyət göstərir. Təşkilatın əsas məqsədi Dayanıqlı İnkişaf Məqsədlərinin (SDG) və Paris İqlim Sazişinin icrası üçün qlobal elmi və texniki resursları səfərbər etməkdir. Hazırda 150-dən çox ölkədə 1900-dən artıq universitet, tədqiqat mərkəzi və dövlət institutunu birləşdirən bu nəhəng şəbəkə, akademik biliklərin praktiki həllərə çevrilməsində, xüsusilə isə dayanıqlı kənd təsərrüfatı və ekoloji tarazlığın qorunmasında əsas rol oynayır.
SDSN-in üzvlüyü ADAU üçün geniş perspektivlər açır. Strategiya Şurasında təmsil olunma universitetə qlobal gündəliyin müəyyənləşdirilməsində və strateji qərarların qəbulunda birbaşa iştirak imkanı verir. Bu platforma vasitəsilə ADAU-nun alimləri dünyanın aparıcı universitetləri ilə birgə layihələr həyata keçirə, qrant proqramlarına çıxış əldə edə və kənd təsərrüfatında tətbiq olunan son texnoloji innovasiyaları Azərbaycana transfer edə biləcəklər. Bundan əlavə, bu əməkdaşlıq universitetin beynəlxalq reytinqlərdəki mövqeyini möhkəmləndirəcək.
Bu uğur, ADAU-nun dayanıqlı gələcək naminə üzərinə götürdüyü öhdəliklərin beynəlxalq səviyyədə təsdiqi kimi qəbul edilir. Universitetin strateji inkişaf planına uyğun atılan bu addım, müasir aqrar təhsilin və elmin inkişafı yolunda mühüm əhəmiyyət daşıyır. Eyni zamanda, bu, Azərbaycanın qlobal dayanıqlı inkişaf hədəflərinə verdiyi töhfənin bariz nümunəsidir.